ڕاپۆرتێکی نوێی سکرتێری گشتی نەتەوە یەکگرتووەکان لەسەر بارودۆخی مافەکانی مرۆڤ لە ئێران بەرکاهێنانی بەرفراوانی ڕێوشوێنەکانی سزادان و توندوتیژییەکان بە پشتیوانی حکومەت بۆ سەرکوتکردنی خەڵکی شەرمەزار دەکات. میشێل باچێلێت کۆمیساریای باڵای ئەو ڕێکخراوە جیهانییە بۆ مافەکانی مرۆڤ ڕاپۆرتەکەی پێشکەش بە ئەنجومەنی مافەکانی مرۆڤی نەتەوە یەکگرتووەکان کرد .
ڕاپۆرتەکە ئاماژە بەوە دەکات ئابووری لە کارکەوتوی ئێران، خراپبوونی ئاستی ژیان و زیادبوونی ئاڵۆزی باری کۆمەڵایەتی و سیاسی هاوکاتی پەتای کۆڤید-19 بوونەتە هۆی ناڕەزایەتی زیاتری خەڵکی.
ڕاپۆرتەکە دەڵێت سەرباری ئەم کێشانە، دەسەڵاتداران هیچ خواستێکیان نیشان نەداوە بۆ ئەنجامدانی چاکسازییەکی ڕاستەقینە یان کاردانەوەیەکی میهرەبانانە بۆ ئەو بارودۆخەی لە ئەنجامی ئەم قەیرانانە دروستبوون. ڕاپۆرتەکەی سکرتێری گشتی ئاماژە بەوە دەکات حکومەت هەر سورە لەسەر کۆنترۆڵکردنی زیاتر و سەپاندنی سزای توندتر.
باچەلێت، بۆ نموونە ئاماژەی بەوەداوە، کە ئێران بەردەوامە لە بەکارهێنانی بەربڵاوی سزای لە سێدارەدان بۆ ئەو کارانەی کە لە یاسای نێودەوڵەتیدا “تاوانی هەرە گەورە پێکناهێنن”.
