سه‌رۆك وه‌زیرانی عێراق رایگەیاند، هەوڵێك هەیە بۆئەوەی پاره بۆ هەرێمی كوردستان نەنێردرێت، ئه‌و هه‌وڵه‌ش له‌لایه‌ن به‌شێك له هێزه سیاسییه‌كانه‌وه‌یه و ئامانج لێی دژایه‌تی هه‌رێمی كوردستانه.
مسته‌فا كازمی، سه‌رۆك وه‌زیرانی عێراق، له‌دیدارێكدا له‌گه‌ڵ كه‌ناڵی عێراقیه رایگه‌یاند، گه‌لی كوردستان به‌شێكه له عێراق و ناكرێت فه‌رمانبه‌ره‌كانی بێ موچه بن و موچه‌كانیان مانگانه وه‌رنه‌گرن.
دەشڵێت: “ئەو پارەیەی دەینێرن بۆ هەرێمی کوردستان وه‌ك پێشینەیەكه تا موچه‌ی فه‌رمانبه‌رانی پێ بدرێت، نەک پشکی هەرێم لە یاسای 2021، به‌ڵكو ناردنی پاره‌كه تا ئه‌وكاته‌یه لیژنه هاوبه‌شه‌كان كار و وردبینیه‌كانیان ته‌واو ده‌كه‌ن”.
ئاشكراشیكرد، هەوڵێك هەیە بۆئەوەی پاره‌كە بۆ هەرێمی كوردستان نەنێردرێت، ئه‌و هه‌وڵه‌ش له‌لایه‌ن به‌شێك له هێزه سیاسییه‌كانه‌وه‌یه و ئامانج لێی دژایه‌تی هه‌رێمی كوردستانه، كه بۆ بانگه‌شه‌ی هه‌ڵبژاردن و راكێشانی شه‌قامی عێراقی به‌كاریده‌هێنن.
