نەتەوەیەکگرتووەکان لە بارەی کەمی ئاوی خواردنەوە و خراپتربوونی دۆخی بڵاوبوونەوەی کۆرۆنا لە شارەکانی ڕۆژئاوای کوردستان هۆشداری دەدات.
نووسینگەی نەتەوەیەکگرتووەکان لە ڕاپۆرتێکیدا ڕایگەیاند، پڕۆژەی ئاوی عەلووک کە ئاو بۆ نزیکەی نیو ملیۆن کەس دابیندەکات لەکار کەوتووە و ئەمەش کێشەى جدی بۆ هاوڵاتیانی شارەکانی ڕۆژئاوای کوردستان دروستکردووە.
ئاماژەى بەوەشکردووە، ئەم پڕۆژەیە کە ئاوی دانیشتوانی حەسەکە دابیندەکات لەژێردەستى گروپەکانی نزیک لە تورکیایە و بە تەواوی بەرەو لەکارکەوتن دەچێت.
ئەو بنکەیەی سەر بە نەتەوەیەکگرتووەکان هەروەها لە تەشەنە سەندنی کۆرۆنا لە ناوچە ژێر کۆنترۆڵەکانی کورد لە سوریا بە تایبەتی لە کەمپی ئەلهەول هۆشداریی داوە.
نوسینگەکە لەسەر هەوڵی نەتەوەیەکگرتووەکان بۆ دروستکردنی پڕۆژەى ئاوی خواردنەوەی دانیشتووانی ئەو ناوچە و ڤاکسینی کۆرۆنا جەختی کردووەتەوە.
