ئەو كەسەی درەختەكانی سەر شەقامی نزیك بانكی چەمچەماڵی هەڵكەندبوو، لەلایەن هێزەكانی ئاسایشەوە دەستگیر دەكرێت.
بەڕێوەبەرایەتی ئاسایشی رۆژئاوای سلێمانی رایگەیاند، شارەوانی چەمچەماڵ لە پێناو سەوزكردنی شارۆچكەکە و ژینگەیەكی تەندرووست، چەند نەمامێكی لە گەڕەكی راپەڕین نزیك بانكی چەمچەماڵ چاند، بەڵام لەلایەن دوو كەسەوە نەمامەكان شەوی ۱٤ لەسەر ۱٥ / ٩ /٢٠٢١ هەڵدەكەندرێن و دەدزرێن.
راشیگەیاندووە، هێزەكانیان پاش بەدواداچوون و كۆكردنەوەی زانیاری، كەسێكیان بە ناوی أ ، أ ، ر، دانیشتووی شارۆچكەی چەمچەماڵ دەستگیركرد، لەگەڵ كەسێكی دیكەی دانیشتووی شارۆچكەكە تاوانەكەیان ئەنجام داوە، بەڵام لە ئێستادا هەڵهاتووە و شوێنەكەی نادیارە.
ئاشكراشی كرد، پاش هەڵكێشانی نەمامەكان گواستوویانەتەوە بۆ باخێكی نزیك گوندی گورگەی، لەلایەن هێزەكانیانەوە دەست بەسەر نەمامەكان و ئوتۆمبێلی تۆمەتبارە هەڵهاتووەكەدا گیراوە.
شایانی باسە، تۆمەتبارەكان بە فەرمانی دادوەری دادگای لێكۆڵینەوەی چەمچەماڵ، بەپێی ماددەی ٤٤١ بڕگەی ١١ فەرمانی دەستگیركردنیان هەبووە.
