سه‌رۆكی كۆمیسیۆنی باڵای هه‌ڵبژاردنه‌كانی عێراق دەڵێ، دوای 90 خوله‌ك ئه‌نجامه‌كانی هه‌ڵبژاردنی بنكه‌كانی ده‌نگدان ده‌گه‌نه به‌غدا و دوای 24 كاتژمێر له ئه‌نجامدانی هه‌ڵبژاردنی گشتی، ئاکامی سه‌ره‌تایی هه‌ڵبژاردنه پێشوەختەکەی عێراق، راده‌گه‌یه‌نرێت.
ئه‌مڕۆ پێنجشه‌ممه جه‌لیل عه‌دنان خه‌له‌ف، سه‌رۆكی كۆمیسیۆنی هه‌ڵبژاردنه‌كانی عێراق له كۆنفرانسێكی رۆژنامه‌وانیدا رایگەیاند، له ماوه‌ی 90 خوله‌كی دوای داخستنی بنه‌كه‌كانی ده‌نگدان، ئه‌نجامی هه‌موو پارێزگاكان ده‌گاته ناوه‌ندی تۆماركردنی داتاكانی كۆمسیۆن و، دوای 24 کاتژمێریش ئاکامی سەرەتایی هەڵبژاردنە پێشوەختەکەی ئەنجوومەنی نوێنەرانی عێراق رادەگەیندرێت.
ئه‌وه‌شی خسته‌ڕوو كه بۆ هه‌ڵبژاردنی رۆژی 10ی تشرینی یه‌كه‌م، كۆمسیۆنی باڵای سه‌ربه‌خۆی هه‌ڵبژاردنه‌كان په‌یڕه‌وی له یاسای نوێی هه‌ڵبژاردنه‌كان ده‌كا، عێراق به‌سه‌ر 83 بازنه‌ی جیاواز و فره‌ڕه‌نگدا دابه‌شكراوه.
سه‌رۆكی كۆمیسیۆنی هه‌ڵبژاردنه‌كانی عێراق روونیشیكرده‌وه، كه ئه‌ندامێكی ئه‌نجوومه‌نی كۆمسیاران، به تایبه‌تی ره‌وانه‌ی پارێزگای كه‌ركووك كراوه و، تا رۆژی هه‌ڵبژاردن سه‌رپه‌رشتی ئاماده‌كارییه‌كانی هه‌ڵبژاردنی ئەو پارێزگایه ده‌كا.
