بەپێی بەڵگەنامەیەكی دەستنووسی سەددام حسێن، ئاشكرای دەكات كە بڕیاریداوە حسێن كامل و سەدام كاملی زاوای و هاوەڵەكانیان بە شەهید ئەژمار بكرێن، ئەوەش سەرباری تۆمەتبارکردنیان بە خیانەتکردن لە عێراق كوژران.
بەگوێرەی بەڵگەنامەك کە بڵاوبووەتەوە، سەدام حسێن بە دەستوخەتی خۆی لە رێککەوتی 15ی حوزەیرانی 1998 نووسیویەتی: خوالێخۆشبوو حسێن كامل و هەموو ئەوانەی لەگەڵیدا كوژران لە هەڵمەتی جیهادی عەشایەری 23ی شوباتی 1996، بە شەهید ئەژمار دەكرێن و سەرجەم ماف و ئیمتیازاتەكانیان بۆ ئەژمار دەكرێت.
بڕیارەكە كە پاش دوو ساڵ لە كوژرانیان دراوە و جەخت لەوەش دەكاتەوە نابێت لە میدیا و تەلەفزیۆندا بڵاوبكرێتەوە.
حسێن كامل و سەدام كامل ئامۆزا و زاوای سەدام حسێن بوون و پاش جیابوونەوەیان و هەڵهاتنیان بۆ وڵاتی ئوردن، بە پێدانی بەڵێنی لێبوردن گەڕانەوە بۆ بەغدا، بەڵام لە شوباتی 1996 بە بەشداری عودەی و قوسەی و بە سەرۆكایەتی عەلی حەسەن مەجید، بە پاساوی تۆڵەی عەشایەری لە ماڵی خۆیاندا گەمارۆدران و لەگەڵ پاسەوان و ئەندامانی دیکەی خێزانەكانیان كوژران.
