کە منداڵت دەبێت گرنگترین شت لە لای منداڵەکەت و تەندروستی منداڵەکەتە، بەڵام ڕەنگە هەندێک جار لە شیرپێدانی سرووشتی دوو دڵ بیت بەهۆی ترسی گۆڕانی شێوەی مەمکەکانتەوە. بەڵام پێویستە ئەوە بزانیت کە شیری دایک چەند سوودی هەیە بۆ کۆرپەکەت و، ئەو سوودانەش بە درێژایی تەمەن منداڵەکەت دەپارێزێت لە چەندەها جۆری نەخۆشی.
لێرەشدا چەند سوودێکی شیری دایکتان بۆ ڕوون دەکەینەوە.
ئەو منداڵانەی شیری دایک دەخۆن %٢٠ مەترسی مردنیان کەمترە لە تەمەنی ٢٨ ڕۆژی بۆ ساڵێک لە چاو ئەو منداڵانەی کە شیری وشک دەخۆن. ئەو منداڵانەی شیری دایکیان دەخۆن مەترسی تووشبوونیان بە شێرپەنجە کەمترە لە چاو ئەو منداڵانەی شیری وشک دەخۆن. شیری دایک مەترسی تووشبوون بە نەخۆشی شەکرە و هەوکردنی ڕیخۆڵە کەم دەکاتەوە. شیری دایک منداڵ دەپارێزێت لە تووشبوون بە هەستیاری، چونکە ئەو شیرانەی کە دەدرێن بە منداڵ، بڕێکی زۆر لە پێکهاتەی شیری ئاژەڵی تێدایە، کە ئەگەری دروستبوونی هەستیاری (حەساسیەت) لە منداڵدا زیاد دەکات.
لێکۆڵینەوەکان ئەوەیان سەلماندووە، کە شیری دایک مادەیەک دەر دەدات ئەگەری تووشبوون بە هەستیاری کەم دەکاتەوە و، ناهێڵێت منداڵ تووشی هەستیاری ببێت، کاتێک تەمەنی ٦ مانگی تەواو دەکات و خواردنی پێ دەدرێت. لێکۆڵینەوەکان سەلماندوویانە کە پەیوەندییەکی پتەو هەیە لەنێوان شیری دایک و زیرەک بوون و توانای مێشکی منداڵ.
لە لێکۆڵینەوەیەکدا کە لەسەر توانای مێشکی منداڵ ئەنجام دراوە لە نێوان ١٧،٠٠٠منداڵێ ساوادا، هەتا تەمەنی ٦ ساڵی، لێکۆڵەران لە ئەنجامدا ئەوەیان بۆ دەرکەوتووە ئەو منداڵانەی شیری دایکیان پێدەدرێت مێشکیان باشتر گەشە دەکات و، توانای تێگەشتن و زیرەکییان زیاترە لە چاو ئەو منداڵانەی شیری وشک دەخۆن. شیری دایک منداڵ لە قەڵەوی دەپارێزێت.
ئەو مندالانەی شیری دایکیان دەخۆن، لە پاش تەمەنی ٦ مانگی توانای خواردنیان زۆر باشترە لە چاو ئەو منداڵانەی شیری وشک دەخۆن. شیری دایک مەترسی مردنی لە ناکاوی منداڵ کەم دەکاتەوە، کە ئەویش منداڵی یەک ڕۆژە تا ٦ مانگی دەگرێتەوە. شیری دایک تەنیا لە منداڵیدا سوودی نییە بۆ منداڵەکەت، بەڵکو بۆ تەمەنی هەرزەکاری و تەنانەت پیریش مەترسی چەندەها نەخۆشی وەکو شەکرە و بەرز بوونەوەی پەستانی خوێن و کۆڵسترۆڵ کەم دەکاتەوە
