: وانەیەک
عەبدوڵا تۆفیق⁄ ڕاھێنەری دەروونی
سوید ….
ئەم ڕوداوەی ئەڵمانیای ھەفتەی ڕابردوو کە کوردێک بە قارەمان ناوی برا، ئەو ڕووداوەی بەبیر ھێنامەوە کە لە ساڵی ١٩٩٥ لە سوید ڕوویدا.
ڕووداوەکەی سوید بەم جۆرە بوو:
کوڕێکی کورد پێم وایە ھەولێری بوو، بەناوی بەختیار، لە دوکانێکی زەرەنگەر لە ستۆکھۆڵم کاری دەکرد. بەختیار نیوەڕۆیەک بەتەنھا لە دوکانەکە دەبێ و چەند دزێک ھەڵئەکوتنە سەر دوکانەکەو بڕێک ئاڵتون و پارە دەدزن. کاتێک دزەکان دەیانەوێ بچنە ناو سەیارەکەیانەوە پێش ئەوەی پۆلیس بگاتە ئەوێ، بەختیار ڕادەکات بۆیان و دەمانجە لە یەکێکیان دەسێنێت. بەو دەمانچەیە تەقە لە یەکێکیان دەکات و قاچی بریندار دەکات و دەکەوێ. کاتێ پۆلیس دەگاتە ئەوێ پۆلیس دزەکەو بەختیاریش دەخەنە بەندینخانەوە. بەختیار نزیکەی ١ ساڵ بەندکرا.
کاتێ بەختیار لە بەندینخانە ھاتەدەرەوە لەیەکێ لە کەناڵە باشەکانی سوید( کەناڵی ٤) چاوپێکەوتنێکیم بینی. ئەوەندەی بیرم بێ بەختیار ووتی کە ئەو لە کوردستان پێشمەرگە بووە و کەسێکی بوێرە، ئەو بەرەو ڕووبوونەوەشی بۆیە کردووە وایزانیوە کە وڵاتی سوید خەڵاتی جوامێری و سوپاسی دەکەن.
لە وڵاتی سوید مرۆڤ فێرناکەن بەرەو ڕووی ئەو جۆرە کێشانە ببێتەوە، بەڵکو بەجێی بھێڵێ بۆ پۆلیس و یاسا.
زۆر یاسای تایبەت ھەیە کە دەبێ ھاوڵاتی ھەر وڵاتێک بزانێ کە کەی دەتوانێ ڕووبەڕووی ببێتەوە، ئەگینا کار لەکار دەترازێ و زۆر خراپیش بەسەریدا دەشکێتەوە.
با ئەم ئازایەتیەی کوڕە کوردەکەی ھەندەران نەبێتە ھاندان بۆ زۆرێکیتر کە لەوانەیە زۆرشتی ژیانیان لەدەست بدەن بەھۆیەوە. بەداخەوە ئازایەتی ناخوات کاتێ یاسا سەروەربێ.
