دەزگای دارایی پەرەپێدانی نێودەوڵەتی ئەمەریكا بۆ فراوانكردنی پیشەسازی غاز لە هەرێمی كوردستان، رێككەوتنێكی دارایی بە بڕی 250 ملیۆن دۆلار واژۆ دەكات.
كۆمپانیای دانەغازی ئیماراتی لە راگەیەندراوێكدا دەڵێ، كۆمپانیای سنوورداری پێرڵ پترۆلیۆم، ئەو كۆنسۆرتیۆمەی لە لایەن هەردوو كۆمپانیای ئیماراتی دانەغاز و كرێسنت پترۆلیۆمەوە ڕابەرایەتی دەكرێت، رێكەوتنێكی بە بڕی 250 ملیۆن دۆلار لەگەڵ دەزگای دارایی پەرەپێدانی نێودەوڵەتی ئەمەریكا (DFC) واژۆکردووە، بە مەبەستی دابینكردنی بودجەی پێویست بۆ كارەكانی فراوانكردنی گەورە لە كێڵگەی غازی كۆرمۆری هەرێمی كوردستان، رێکكەوتنە داراییەكە بودجەی پێویست بۆ پڕۆژەی فراوان كردنی كۆرمۆر دابین دەکا.
راشیانگەیاندووە، كۆی تێچووی پڕۆژەكە 630 ملیۆن دۆلاره لە پێناو زیادكردنی توانای بەرهەمهێنان بە رێژەی 50% بۆ 690 ملیۆن پێ سێجا رۆژانە لە نیسانی 2023ەوه.
ئەوەش خراوەتەڕوو، پڕۆژەی KM-250 یەكەم قۆناغی پڕۆژەی فراوانكردنی دوو هێڵی بەرهەمهێنانە لە كورمۆر، جگە لە هەڵكەندنی بیرە نوێكان، كە ئامانج لێی بەرزكردنەوەی توانای بەرهەمهێنانە بۆ گەیشتن بە یەك ملیار پێ سێجا لە رۆژێكدا، كارەكان لە مانگی نیسانی 2021 دەستیانپێكردەوە، ئەوەش دوای ئەوەی ساڵی رابردوو بەهۆی پەتای كۆرۆناوە راگیرابوون، ئێستا لە بواری جێبەجێكردندان، بە ئامانجی تەواو بوون تا مانگی نیسانی 2023.
بەپێی راگەیەندراوەكەی كۆمپانیای دانەغاز، كۆی وەبەرهێنانی كۆمپانیا ئەمەریكاییەكە لە كۆرمۆر، تا ئەمڕۆ 2.1 ملیار دۆلار تێپەڕدەكا، لەگەڵ كۆی بەرهەمی كەڵەكە بوو بە بڕی زیاتر لە 341 ملیۆن بەرمیل هاوتای نەوت لە غازی سرووشتی و شلەكان.
