بە بۆنەی یادی 9 ساڵەی کارەساتی کۆمەڵکوژی شنگال، کۆنفدراسیۆنی ڕەوەندی کوردستانی، پەیامێکیان بڵاو کردەوە، کە ئەمەی خوارەوە دەقەکەیەتی.
دەقی پەیامەکە:
9 ساڵ بەسەر کارەساتی کۆمەڵکوژی شنگال تێپەڕدەبێت، کە کارەساتێکی دیکە بوو بەسەر خوشک و برا کوردە ئێزدییەکان دا هات و جیهانی هەژاند.
رۆژی 3ی8ی2014 چەکدارانی رێکخراوی تیرۆریستی داعش، شنگالیان داگیر کرد، چەندین تاوانی کۆمەڵکوژی، کوشتن و رفاندن، تاڵانکردنی موڵک و ماڵی خەڵکیان ئەنجامدا، بەشێکی شنگالییەکانیش ئاوارە بوون.
لەم بیرەوەرییە دڵتەزێنەدا کۆنفدراسیۆنی ڕەوەندی کوردستانی، وێڕای هاوخەمی قوڵ لەگەڵ خوشك و برایانی ئێزیدی، هاوكات ئیدانەی هەرجۆرە تاوانێک دەکەین بە ناوی هەر بیر و ئایدۆلۆژیایەک دژی مرۆڤایەتی ئەنجام بدرێت.
هەزاران. سڵاوو بۆ گیانی پاکی شەهیدانی شنگال و سەرجەم شەهیدانی رێگای ئازادی کوردستان.
کۆنفدراسیۆنی ڕەوەندی کوردستانی
3ی8ی2023
