ناوەندی ڕەوەندی کوردستانی-ئەلبەرتا سەردانی پەرلەمانتارێکی کەنەدی دۆستی کوردیان کرد و بڕیاریاندا بە یاوەری بەرپرسی ناوەند سەردانی هەرێمی کوردستان بکەن.
رۆژی ۲ی ٨ی ۲۰۲۳ شاندێکی ناوەندی ڕەوەندی کوردستانی-ئەلبەرتا بە سەرۆکایەتی ئەحمەد بناڤی بەرپرسی ناوەند، سەردانی ئۆفیسی (تۆم کمیک) پەرلەمانتاری پارتی پارێزگارانی کەنەدایان کرد و لەسەر چەند پرسێک گفتوگۆیان کرد، کە تێیدا بڕیاردرا شاندێکی پەرلەمانی کەنەدا بە یاوەری بەرپرسی ناوەندی ڕەوەندی کوردستانی-ئەلبەرتا سەردانی باشووری کوردستان بکەن.
لە تەوەرێکی دیکەی ئەو دیدارەدا، باس لە بارودۆخی کوردستان بە گشتیی و رەوەندی کوردستانی لە کەنەدا بە تایبەتی کرا، هەروەها هەڵبژاردنی پەرلەمانی کەنەدا بۆ ساڵی 2024 و ڕۆڵی رەوەندی کوردستانی لە پاڵپشتی پارتی پارێزگارانی کەنەدا و بەتایبەتی تۆم کمیک و دۆستانی دیکەی کورد گفتوگۆی لەسەر کرا.
لەو دیدارەدا عەلی، مستەفا و ئاکۆ لە رەوەندی کوردستانی ئەلبەرتا،یاوەری ئەحمەد بناڤیان دەکرد.
جێی باسە، تۆم و شاندەکەی، چەندین ساڵە لە پەرلەمانی کەنەدا کاری باشیان بۆ هەموو بەشەکانی کوردستان کردووە و دوستی دێرینی کوردن.
