سەرۆکی کۆنفدراسیۆنی ڕەوەندی کوردستانی دەڵێ، یاداشتێکی پشتگیرییان ئاڕاستەی هەردوو وەزارەتی ناوخۆ و کاروباری کۆمەڵایەتی سوید کردووە و وەڵام دراونەتەوە و وێڕای سوپاس کردنیان، پێیانوتوون ئەوە یەکەمجارە کۆنفدراسیۆنێک پشتگیری خۆیان بۆ دەربڕن.
ئسیماعیل کامل سەرۆکی کۆنفدراسیۆنی ڕەوەندی کوردستانی بە ماڵپەڕی فەرمیی کۆنفدراسیۆنی راگەیاند، یاداشتێکی پشتگیری یاساکانی سوید و ئیدانەکردنی ئەو توندوتیژیانەی لەو وڵاتەدا بەهۆی چەند باندێکی مافییاییەوە روویانداوە، ئاڕاستەی هەردوو وەزارەتی ناوخۆ و کاروباری کۆمەڵایەتی سوید کردووە، ئەوانیش وەڵامیان داونەتەوە.
سەرۆکی کۆنفدراسیۆنی ڕەوەندی کوردستانی ئەوەشی خستەڕوو، سکرتێری وەزارەتی کاروباری کۆمەڵایەتی پەیوەندی پێوەکردووە و سوپاسی کردوون، هاوکات ئەوەشیان وتووە، ئەوە یەکەمجارە کۆنفدراسیۆنێک یاداشتێکی پشتگیری خۆیان ئاڕاستەی وەزارەتەکەیان بکەن و پشتگیری لە یاساکانی ئەو وڵاتە بکەن، بۆیە جێی پێزانینیانە.
ئیسماعیل کامل لە درێژەی لێدوانەکەیدا، باسی لەوەشکرد، کە یاداشتەکەیان بە زمانی فینلاندی و نەرویجیش ناردووە بۆ ناوەندی ڕەوەندی کوردستانی-فینلاند و ناوەندی ڕەوەندی کوردستانی-نەرویج، تا ئەوانیش ئاڕاستەی هەردوو وەزارەتی ناوخۆ و کاروباری کۆمەڵایەتی ئەو وڵاتانەی بکەن.
جێی باسە، ماوەیەکە چەند باندێکی مافیا لە سوید کەوتوونەتە پشێوی نانەوە و لە ماوەی تەنیا دوو هەفتەدا ٦ هاوڵاتی سڤیل بەهۆی توندوتیژییەکانیانەوە کوژراون، کە هاوڵاتی تەمەن ٧٠ ساڵیشیان تێدایە.
