لە ماوەی مانگی ڕابردوودا، لانی کەم 81 حاڵەتی پێشێلکاری مافەکانی مرۆڤ لە کوردستانی رۆژهەڵات تۆمار کراوە.
بە پشتبەستن بە ئاماری تۆمارکراو لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو، لە ماوەی مانگی رابردوو، لانی کەم 81 حاڵەتی پێشێلکاری مافەکانی مرۆڤ لە کوردستانی رۆژهەڵات تۆمار کراوە، کە بەو شێوەی خوارەوەیە:
کۆڵبەران 9 حاڵەت
لە ماوەی مانگی ڕابردوودا، 9 کۆڵبەر و کاسبکار لە سنوورەکانی کوردستان بوونەتە قوربانی، کە دوو کەسیان گیانی لە دەستداوە و، یەکێ لەو دوو کەسە بە هۆی ڕووداوی هاتووچۆ و کەسێکیش بە هۆی بەربوونەوە لە هەڵدێرەوە گیانیان لە دەستداوە.
هەروەها 7 کۆڵبەر و کاسبکار بریندار بوون، کە 6 کەسیان بە تەقەی ڕاستەوخۆی هێزە چەکدارەکانی ئێران بووە و، کەسێکیان بە هۆی ڕووداوی هاتووچۆوە بریندار بوون.
سێدارە و گیان لە دەستدان لە گرتووخانە 5 حاڵەت
لە مانگی یەکی ئەمساڵ، لانی کەم 4 بەندکراوی کورد لە گرتووخانەکانی ئورمیە، کرماشان و ئەلیگودەرز بە تۆمەتی کوشتنی ئەنقەست 3 حاڵەت و، تۆمەتی پەیوەندیدار بە ماددە هۆشبەرەکان 1 حاڵەت، لە سێدارە دراون.
هەروەها، لەو ماوەیەدا بەندکراوێکی کورد لە گرتووخانەی نێوەندی ئیلام بە هۆی پێڕانەگیشتنی پزیشکی گیانی لە دەست داوە.
کوژران و بریندار بوونی هاووڵاتییانی مەدەنی و تەقینەوەی مین 6 حاڵەت
لە ماوەی مانگی ڕابردوودا، لانی کەم 4 هاووڵاتی کورد لە شارەکانی قەسری شرین، دێهلۆڕان، بە هۆی تەقینەوەی مینەوە بوونەتە قوربانی، کە یەکێکیان ژن و یەکێکیان منداڵ بووە.
هەروەها، هاووڵاتییەکی مەدەنی خەڵکی کرماشان، بە تەقەی هێزە چەکدارەکانی ئێران کوژراوە و هاووڵاتییەکی خەڵکی بانەش بریندار کراوە.
دەستبەسەر کران و سەپاندنی سزا 54 حاڵەت
بە پشتبەستن بە ئامارەکانی هەنگاو، لە ماوەی مانگی ڕابردوودا، لانی کەم 51 هاووڵاتی کورد کە 4 کەسیان ژن و 2 کەسیان مێردمنداڵ بوون، لەلایەن ناوەندە ئەمنییەکانی حکومەتی ئێرانەوە بە تۆمەتی چالاکی سیاسی و مەدەنییەوە دەستبەسەر کراون.
هەروەها، 3 چالاکوانی کورد بە تۆمەتی چالاکی سیاسی، سەرجەم سزای 2 ساڵ و 6 مانگ بەندکران و پێ بژاردنی 30 ملیۆن تمەن، پارەیان بە سەردا سەپێندراوە، کە یەکێکیان تەمەنی 18 بووە.
کرێکاری 7 حاڵەت
لەو ماوەیەدا لانی کەم 7 کرێکاری خەڵکی شارەکانی تیکاب، شاباد، سنە، سەوڵاوا، ٢ حاڵەت، جوانڕۆ و دیواندەرە لە کاتی کار کردن و بە هۆی ڕووداوی کارەوە گیانیان لە دەست داوە.
