سوعدا خەدیرزادە بەندکراوی سیاسی کورد کە دووگیانە، لە گرتووخانەی ژنانی ناوەندی ئورمیە ڕاگیراوە، بە نیشانەی ناڕەزایەتی دەربڕین بە ٧ مانگ ڕاگیرانی بێ دادگایی کرانی، لە ڕۆژی سێشەممەی هەفتەی رابردووەوە، مانی لە خواردن گرتووە و گیانی خۆی و کۆرپە ٨ مانگانەکەی لە مەترسیدایە.
بەگوێرەی ئەو تۆمارە دەنگییەی کە لەناو گرتووخانەی ئورمیەوە دەست هەنگاو گەیشتووە، سوعدا خەدیرزادە دەڵێت، منیان وەک بارمتە لە گرتووخانە ڕاگرتووە، ئەوەش بەمەبەستی دانپێدانانی زۆرەملێ و هەڕەشەیان لێکردووم و، هێزە ئەمنییەکان پێشنیاری کاردانەوەی دوور لە ئەخلاقیان بەرانبەرم کردووە.
سوعدا خەدیرزادە، تەمەنی ٣٢ ساڵە و خەڵکی پیرانشارە، ڕۆژی پێنجشەممە ١٤ی ئۆکتۆبەری ٢٠٢١، لەلایەن هێزەکانی ئیدارەی ئیتڵاعاتی پیرانشار دەستبەسەرکراوە و بۆ ئورمیە گوازراوەتەوە. ناوبراو دوای ٢٥ ڕۆژ و تەواوبوونی لێپرسینەوەکانی بۆ گرتووخانەی ژنانی ناوەندیی ئورمیە گوازرایەوە و، لەوکاتەوە بێ ئەوەی دادگایی بکرێت لە بەندی ژنان ڕاگیراوە، هاوکات لە خزمەتگوزاری پزیشکی تایبەت بە قۆناغی دووگیان بوونیش بێبەشکراوە.
جێگای ئاماژەیە کە سوعدا خەدیرزادە ئەو کاتەی کە دەستبەسەر کراوە دوو گیان بووە و ئێستا کۆرپەکەی ٨ مانگانە و، مانگرتن لە خواردنی ناوبراو، تەندروستی خۆی و کۆرپەکەی بەرەوڕووی مەترسی دەکاتەوە
