Hêja Selim Çürükkaya û Cankurd
Roja 20.03.2022, di șahiya Newrozê de, ku Komeleya KOMKAR û Konfederasiyona Revenda Kurdistanî li dar xistibûn, ez rastî mamhoste yê hêja kak M. Selîm Çürükkaya hatim. Paș ku me silaveke germ da hevdu û Newroz li xwe û li gelê Kurdistanê bi taybet û li hemî gelên, ku pê șadibin pîroz kir, wî camêrî libek ji pirtûka xwe (Dr. Seîd) diyarî min kir û nivîsand, ku ew hezdike ez kurtegotarekê di mafê pirtûkê de binivîsim. Ji xwe ez li ser hemî pirtûkên ji min re tên diyarîkirin kurte nasdanekê lêdikim û ta niha li ba min gelek gotarêd wilo kin û kurt hatîne civandin. Lê ev pirtûk rast berhemeke giranbiha ye, hem ji aliyê mijarê ve, ku kak M. Selîm Çürükkaya lêkiriye û hem ji aliyê wergerandinê ve bo zimanê Kurdî, ku hêja Welat Azad pê rabû ye. Weșanxane ya DOZ jî karekî gelek hêja û bi nirx ji bo derxistina vê pirtûkê kiriye, bi sernavê “Romaneke Biyografîk” daye çapkirin û belavkirin (1).
Nivîsevanê pirtûkê, hêja M. Selîm Çürükkaya, ku di nav Kurdan de pir naskirî ye, wekî Kurdekî gelek salan di girtîgeha hov a Tûraniyan de maye, pir êș û derd jê dîtiye, di nav kefteleft û têkoșîna neteweya Kurd de cîhê xwe girtiye û deh pirtûkêd wî hene, li bajêrê Hamburg/Almaniya bi cîh û war bûye û xebata xwe ya neteweyî digudîne, bi xwe birayê mezinê șehîd Dr. Seid e, ku bi navê Dr. Sulêman jî hatibû naskirin.
Dr. Seid an Dr. Suleyman Kî ye?
Ez ê di vir de bergehê bidim peyvên van hêjayan, ku li ser vî mirovî axivîne:
Hêja Serok Masûd Barzanî, ku gava Dr. Seid wek xwebexșekî kurdistanî șehîd bûye, serokê herêma bașûrê Kurdistanê bû. Cenabê serok ev gotiye:
“Şehîd Dr. Saîd Çürükkaya genarlê azadî û serxwebûna me ye… Dr. Seîd Kurdekî qehreman û rastîn bû, ku bi dilxwazî di șerê bi terorîstên DAIŞ’ê de hevkariya xwîșk û birayên pêșmerge kir. Ew bi dilsozî di șerê berevaniya Kurdistanê de beșdar bû û di vê rêya pîroz de canê xwe feda kir. Bîranîna șehîd Dr. Saîd hertim dê zindî bimîne. Silav li giyanê pak ê Dr. Saîd û hemû șehîdên Kurdistanê.”
Fîlozofê Firensî yê navdar Bernard Henri Levy jî ev kurtegotin li ser DR. Saîd got: “Dr. Suleyman ji bo jiyana gelê xwe biparize hatibû vî șerî. Lê jiyana xwe feda kir. Divê navê wî li deftera mezin a zêrîn, ya artêșa KRGê de, bi tîpên agirîn bêt nivîsandin, da ku dunya wî ji bîr neke.”
Civatzana yê mezin Dr. Îsmaîl Beșikçî jî li ser Dr. Saîd Çürükkaya ev gotin kiriye: “Dr. Saîd sembola hișmendiya neteweya Kurd, zimanê Kurd, alaya Kurd, hișmendiya niștimanî ya Kurd û hișmendiya azadiya Kurd bû…” Rojnamevana bi nav û deng Aliza Marcus jî wilo nivîsandibû: “Saîd wekî ba bû, bê rawestan bû, digobilî û diçû. Ew bi peyvan nayê vegotin…”
Bê guman gelek rewșenbîrên Kurd jî li ser jiyan, têkoșîn, cangorî û hișmendiya Dr. Saîd Çürükkaya gotinên xwe kirin û nivîsandin, lê ev pirtûk, ku ji 677 rûpelan e û ji 51 birran e, wekî “romaneke jiyanbêjî”, ji serî de dest pêdike heta Dr. Saîd bi xwîna xwe ya pak zevînê Kurdistana xwe sor dike, li qelem dixîne, bi hûrikî û zanayî li ser malbata Dr. Saîd, ew malbata ku xudan temenekî nirxdar e, hatiye lêkirin. Nivîskar bi xwe jî di nav wê malbatê de, di wa têkoșîna dîrokî de, li hember zorbaziya hovên nijadperest, cîhê xwe di tenișta birayê xwe de girtiye û baș dizane Ev Dr. Saîd çi mirov bû, çi têkoșer û çi serhildêrekî mezin bû.
Herdu bira ketin nav rêzên serhildana gelê Kurd, da mûmeke bi ruhnî di tariya șeva gelê Kurd pêxînin, gelek êș û tehlî dîtin û kișandin, û gava dîtin ku ev serhildan ji rêya rast verê dibe, dest hildan û gotin: “-NA… Em ne amadene gelê Kurd ji tariyekê derxînin, da em bibin bo rewșeke ji ya niha tarîtir, em bo azadiya neteweya Kurd dixebitin û em amade nînin bibine destek û berdestên dîktatoriyeke partînî ya pașkeftî, di va çerxa azadiyê de… Rêya rast a netewea Kurd ne ev rê ye…”
Bi rastî, ez naxwazim bi firehî derbas bibim naveroka pirtûkê, ku hatiye lêkirin li ser jiyan û malbat û xwendin û zindan û têkoșeriya van herdu kurên Kurdistanê, yên rêç û șopa xwe di dîroka xebata gelê me de li bakur û li bașûrê Kurdistanê hêlane, da xwendevanê Kurd bi xwe va pirtûka giranbiha û berhemdar bistîne û bixwîne û li ser koçbereke dîrokî ya giring di têkoșîna gelê xwe de baș agahdar bibe.
Nivîskarê vê berhemê bi zanayî û wêjeyî karê xwe teva kiriye, giranbihabûna kefteleft û cangoriya Dr. Saîd bi mijareyî aniye zimên, wergêrê wê jî rast bi Kurdiyeke asan û hêja wergerandiye…
Ji vê bêtir naxwazim tiștekî dî bibêjim, ya baștir ewe, ku mirov bi xwe vê berhemê bixwîne, da Dr. Saîd ê qehreman ji nêz ve binase û bi ser de jî li ser xebata neteweya Kurd haydartir bibe…
Destên we bimînin sax û berhemdar: Kak M. Selîm Çürükkaya û hêja werêrê serkeftî Welat Azad… û supasiyeke taybet bo DOZ û karmendên wê yên çalak.
(1) (Binêre: Feridiye Cad.128/C Beyoǧlu/Istanbul, Çapa yekê: Cotmeh 2020 Istanbul. Email: dozyayinlari@yahoo.com, Tel: 212 297 25 05 û sertifika No.: 47932) Editörê pirtûkê Köroǧlu Karaaslan e, Berg û Rûpelsazî ji aliyê DOZ ve hatiye amadekirin, nexșekêșana bergê pirtûkê: Hilal Çelik e. Ev berhema giranbiha di bin va jimareya fermî de tê dîtin: ISBN: 978-605-4765-32-4
