Sîrwan Barzanî ku yek ji fermandarên hêzên pêşmerge yên herêma Kurdistanê ye, radigihîne, ji ber hebûna valahiya ewlehiyê li navçeyên di bin destê hikûmeta Iraqê de, liv û tevgera DAIŞê zêde bûye.
Di daxuyaniyekê de jibo K24ê Sîrwan Barzanî ragihand, çekdarên DAIŞê şeva borî li nêzîkî gundê Kendal ê ser bi Mexmûrê ve kemînek danîn hejmarek welatî revandin, piştre hinek ji wan hatin azadkirin, lê 5 kes heta niha di destê çekdarên DAIŞê de ne ku 2 ji wan Kurd in.
Got jî: Hêza Pêşmergeyên Kurdistanê beşek ji navçeyê kontrol kiriye û bi Hevpeymaniya Navdewletî re operasyonan dikin, lê DAIŞ li çiyayê Qerçox û aliyê din ên çiya ku di bin kontrola hêzên Iraqî de ye, tevgera DAIŞê lê heye û gelek tonel û şikeft lê hene û çekdarên DAIŞî bi berdewamî xwe ji wê navçeyê vedidizin Mexmûrê.
Destnîşan kir jî: “Berî sala 2017an, ew navçe di destê Pêşmergeyên Kurdistanê de bû û çekdarên DAIŞê nedikarîn nêzîk bibin, lê niha ji ber ku valahiya ewlehiyê heye, liv û tevgera çekdarên DAIŞê li navçeyên di bin kontrola artêşa Iraqê de zêde bûne.
Diyar kir jî, “Niha çekdarên DAIŞê bi şevê bi azadî li çiyayê Qereçoxê digerin û jê ve jî xwe vedidizin derdora Mexmûrê û welatiyan direvînin.”
Berpirsê Mihwerê (6) ê Hêza Pêşmerge Sîrwan Barzanî ragihand, avakirina Jûreya Operasyonên Hevbeş di navbera Pêşmerge û artêşa Iraqê de, gelekî girîng e, lê divê hevahengiya zêdetir hebe.
Tê zanîn piştî ku hêzên hikûmeta Iraqê û heşda şeebî dest danîn ser hejmareke deverên ku beriya li jêr kontrola pêşmerge bûn, êdî careke din metirsî yên terorîstên DAIŞê li wan deveran çê dibin.
